પેટ પકડીને હસાવશે, મનને પ્રફુલ્લિત બનાવશે – ગુજ્જુભાઇ મોસ્ટવોન્ટેડ

ગુજરાતી ફિલ્મ ગુજ્જુભાઇ મોસ્ટ વોન્ટેડ આજે રીલીઝ થઇ રહી છે. ફિલ્મની વાર્તા, સ્ક્રિપ્ટ, ડાયલોગ, સંગીત અને તમામ કલાકારો તમને ફિલ્મની શરૂઆતથી લઇને છેલ્લે સુધી બાંધી રાખશે.

ફિલ્મની શરૂઆત એજન્ટ વિક્રાંત વાઘમારે (જયેશ મોરે)ના એક્શન સીનથી થાય છે. ફિલ્મમાં બે અલગ અલગ વાર્તાઓ એકમેકમાં ભેગી થાય છે. બીજી તરફ અમદાવાદમાં રહેતા અરવિંદ દિવેટીયા (સિદ્ધાર્થ રાંદેરીયા) અને તેમના દિકરા ખગેશ ઉર્ફે કે.ડી (જીમીત ત્રિવેદી), પત્ની ઇંદુ (તેજલ વ્યાસ) અને સાસુ ચંદ્રીકા (પૂર્વી વ્યાસ) શા કારણથી કચ્છ પહોચે છે અને ત્યાંથી બાપ-દિકરો કઇ રીતે પાકિસ્તાન પહોંચી જાય છે, તે રહસ્ય છે. આ ફિલ્મમાં ગુજરાતી કહેવતોનો ભરપૂર સમય પ્રમાણેનો ઉપયોગ, પરફેક્ટ કોમિક ટાઇમિંગ, કોમેડીની સાથે હળવો રોમાન્સ, ફાઇન્ટિંગ સીન, મા-દિકરીની જુગલબંધીમાં સર્જાતી કોમેડી, ક્યાંક ને ક્યાંક અન્ય પાત્રો જોડાઇ જવાથી સર્જાતી કોમેડી, ક્યાંક એક્શન સાથેની કોમેડી ખરેખર અઢી કલાક હાસ્યની છોળો વરસાવી દે છે. પિતા – પુત્રની દરેક પરિસ્થીમાં એક બીજાને તારો વારો -તમારો વારો કહીને એકબીજા પર વાત ઢોળી દેવાનું ફિલ્મની શરૂઆતથી લઇને છેલ્લે સુધીનું કનેક્શન ખરેખર અદ્ભૂત છે. સિદ્ધાર્થ રાંદેરીયા અને જીમિત ત્રિવેદી તો જાણીતા અને એક્ટીંગમાં મોખરાના કલાકારો તો છે જ સાથે જ જયેશ મોરેને તમે આ ફિલ્મમાં એક અલગ જ પાત્રમાં જોશો. ખરેખર કોઇ બોલિવૂડના પાત્રને તમે ફિલ્મમાં જોઇ રહ્યા હો તેવું તેની એક્ટિંગ પરથી લાગે છે. હું ક્યારેય કોઇ કલાકારને કોઇ અન્ય કલાકાર સાથે કમ્પેર કરતી નથી પણ ખરેખર જયેશ મોરેની એક્ટીંગ અને તેના એક્સપ્રેશન તમને બોલિવૂડના કેટકેટલાય હિરોની યાદ અપાવશે.

ફિલ્મમાં અન્ય કલાકારોમાં વ્યોમાં નંદી, સુનિલ વિસરાણી, રાગી જાની, અનિલ માંગે, આલોક ગેગડેકર, શફીક અંસારી અને ફિરોઝ ઇરાની પણ છે.

અંતે ફિલ્મમાં દેશ માટે એક નાગરીકની શું ફરજ છે, તે સંદેશો આપવામાં આવ્યો છે. ફિલ્મની વાર્તા કે પાત્રોનું સંપૂર્ણ વર્ણન કરી દઇશ તો તમે ફિલ્મને થિયેટરમાં માણી શકશો નહીં. સંપૂર્ણ વિગત આપીશ નહીં, તેના માટે ફિલ્મ જોઇ આવો.

ફિલ્મની વાર્તા કે કેટલીક બાબતોની સંપૂર્ણ માહિતી આપતી નથી કારણકે હું અત્યારે ક્રિટીકની રીતે નથી લખી રહી. એક સામાન્ય દર્શક તરીકે ફક્ત મને યોગ્ય લાગતી માહિતી આપને આપી રહી છું. ફક્ત એટલું જ કહીશ કે ખરેખર જો હાસ્યની જીવનમાં જરૂર હોય અને દિલ ખોલીને પેટ પકડીને હસવાની ઇચ્છા હોય તો સમય બગાડ્યા વિના ગુજ્જુભાઇ મોસ્ટ વોન્ટેડ જોઇ આવવામાં મજા છે. ફિલ્મ જોયા પછી મને તમારા અભિપ્રાય જરૂરથી જણાવશો.